ကိုဗစ်ကြောင့် ရွေးကောက်ပွဲ ရွှေ့သင့်လား?

ဒီမေးခွန်းဟာ လူအများက မေးနေကြတဲ့မေးခွန်းပါ။ ဘယ်ပါတီကို ထောက်ခံထောက်ခံ ဒီမေးခွန်းလေးတော့ မေးကြမှာပါ။

အားလုံးသိကြတဲ့အတိုင်း နေရာတိုင်း ဘယ်သူ့ကိုမေးမေး အများစုက NLD သာ မဲပေးမယ် ဖြစ်နေခဲ့ပါတယ်။ ဒီအချက်ဟာ NLD အလံလွှင့်ပွဲကနေ ထင်ရှားစေခဲ့ပါတယ်။ သိကြားမင်းက လူပြည်ဆင်းလာပြီး ဖွတ်ပါတီကို ကြိုတင်မဲပေးရင်တောင် နိုင်ဖို့မလွယ်ပါ။ နိုင်ငံရေးမှာ နှစ်လဆိုတာက အကြာကြီးပါ။ဒါပေမယ့် မိမိရှုံးမှာကို ကြိုသိတဲ့ PPP က နှစ်လနောက်ဆုတ်ဖို့ စပြောပါတယ်။ ဦးကိုကိုကြီး ဦးဆောင်တဲ့ ပြည်သူ့ပါတီကလဲ ပြည်သူ့ကျန်းမာရေးကအဓိက ဘာညာဘာညာဆိုပြီး ရွေးကောက်ပွဲကိုနောက်ဆုတ်ဖို့ပြောလာပါတယ်။ ဒါကအစပါ။ နောက်ပိုင်းမှာ ဖွတ်နဲ့ မအလက လိုက်လာပါမယ်။

ဒါဆိုသူတို့ပြောသလို ရွှေ့သင့်လား?

စာရေးသူအနေနဲ့ ရှုထောင့်သုံးခုကနေ တင်ပြပါမယ်။ ပထမက နိုင်ငံရေးဖြစ်ပြိး၊ ဒုတိယက ကိုဗစ်နဲ့တတိယက စီးပွါးရေး ရှုထောင့်ကပါ။

နိုင်ငံရေးရှုထောင့်

ဒီမိုအစိုးရရဲ့အသက်ဟာ ရွေးကောက်ပွဲပါ။ ရွေးကောက်ပွဲဟာ ဒီမိုအစိုးရရဲ့ တရားဝင်မှုပါ။ အကယ်၍ရွေးကောက်ပွဲသာ မကျင်းပနိုင်ခဲ့ရင် လက်ရှိအစိုးရဟာ တရားဝင်မှုရှိတော့မှာ မဟုတ်ပါ။ မြန်မာပြည်ဟာ ၂၀၀၈ ခြေဥအရ ၂၅% ဟာ တပ်ကလာနေပြီး ညွှန်ချုပ်ကို အာဏာသိမ်းခွင့်တွေ ပေးထားပါတယ်။ဒါဟာ အင်မတန်မှ ကြောက်စရာကောင်းတဲ့ အခြေအနေပါ။ ကျောင်းသားဆန္ဒပြပွဲ၊ အလုပ်သမား၊လယ်သမားဆန္ဒပြပွဲ၊ မဘသဆန္ဒပြပွဲတွေကို အနောက်ကထောက်ပံ့ပြီး လုပ်နေတဲ့တိုင်းပြည်မှာရွေးကောက်ပွဲမရှိခဲ့ မလုပ်နိုင်ခဲ့ရင် စစ်တပ်အနေနဲ့ တရားမဝင်အစိုးရဆိုပြီး အာဏာသိမ်းရ ပိုလွယ်သွားပါမယ်။ ရွေးကောက်ပွဲနဲ့ တရားဝင်အစိုးရကို အာဏာသိမ်းခဲ့ရင် နိုင်ငံခြားတပ်ကို ခေါ်ရလွယ်ပေမယ့် ရွေးကောက်ပွဲမလုပ်နိုင်တဲ့အစိုးရဆိုရင် အာဏာသိမ်းတဲ့တပ်ကို ရင်ဆိုင်ရခက်ပါမယ်။ နိုင်ငံခြားတပ်ကို ခေါ်ရခက်နိုင်ပါတယ်။

ကိုဗစ်ရှုထောင့်

ကိုဗစ်ဟာ ကာကွယ်ဆေးမပေါ်မချင်း ရှိနေမယ့် အန္တရာယ်ပါ။ နိုဝင်ဘာကနေ ဖေဖော်ဝါရီကို ရွှေ့လိုက်တာနဲ့ မပြီးသွားပါ။ မြန်မာပြည်လို ဆင်းရဲတဲ့တိုင်းပြည်မပြောနဲ့ အမေရိကန်မှာလဲ ဖြစ်နေဆဲဖြစ်ပြီးပထမလှိုင်းမှာ အောင်မြင်ခဲ့တဲ့ တောင်ကိုရီးယားလဲ ဖိုက်နေရဆဲပါ။ ဩဇီမှာလဲ lockdown လုပ်လိုက်ဖြုတ်လိုက်နဲ့ တိုင်ပတ်နေတာပါ။ စပိန်မှာ ဖြစ်နှုန်းတက်လာနေသလို ပြင်သစ်နဲ့ ယူကေမှာလဲ တစ်နေ့ကိုသုံးထောင်လောက်ဖြစ်နေတာပါ။ ဒါကြောင့် ကိုဗစ်ကျအောင်ပြန်စောင့်ရင် ၂၀၂၁ အကုန်အထိ စောင့်ရမှာပါ။ ဒါတင်မဟုတ်ဘဲ ကျန်းမာရေးကြောင့် ရွေးကောက်ပွဲရွှေ့ရင် လူတွေဟာ ကိုဗစ်ကြောင့်မသေရင်တောင် အာဏာသိမ်းလို့ စစ်အစိုးရလက်ထက်ကလို အခြားရောဂါတွေနဲ့ လူမသိ သူမသိသေကြရမှာပါ။

စီးပွါးရေးရှုထောင့်

ကိုဗစ်ဟာ ကမ္ဘာပေါ်က နိုင်ငံတိုင်းမှာ စီးပွါးရေးကို ကျစေပါတယ်။ ဒါကြောင့် ရွေးကောက်ပွဲမကျင်းပနိုင်ရင် စီးပွါးရေးမူဝါဒကို ချမှတ်ဖို့ ခက်ပါမယ်။ ရင်းနှီးမြုပ်နှံသူများက တည်ငြိမ်တဲ့ အစိုးရကို လိုပါတယ်။ ဒါမှ ရင်းနှီးမြုပ်နှံသူများရဲ့ ယုံကြည်မှု investor confidence ကို ရမှာပါ။ ဥပမာ ရွေးကောက်ပွဲကိုနိုဝင်ဘာ ၈ ရက်မှာပြီးရင် တက်လာတဲ့အစိုးရက စီးပွါးရေးမူဝါဒအသစ်နဲ့ အကောင်အထည်ဖော်ရုံပါ။မဟုတ်ရင် ဘာပေါ်လစီမှ တရားဝင်ချမရပါ။

ကမ္ဘာ့နိုင်ငံများမှာ ကိုဗစ်ကာလ ရွေးကောက်ပွဲ လုပ်ခဲ့လား?

ဒီမိုအင်အားကြီး အမေရိကန်ဟာ ကိုဗစ်ဖြစ်သူ ၆ သန်းခွဲနဲ့ သေသူ နှစ်သိန်းနီးပါးရှိတာတောင် သူလဲနိုဝင်ဘာမှာ ရွေးကောက်ပွဲကို လုပ်ပါမယ်။ အမေရိကန်မှာ ၂၀၀၈ ခြေဥမရှိသလို စစ်တပ်ကလဲလွှတ်တော်ထဲမှာ ထိုင်မနေပါ။ ထို့အတူပါဘဲ စပိန်၊ ဂျာမနီ၊ တောင်ကိုရီးယား၊ Iceland၊ ဆားဘီးယား၊ မွန်ဂိုလီးယား၊ ဘရွန်ဒီ၊ Dominican Republic၊ စင်ကာပူ၊ ပိုလန်၊ ခရိုအေးရှား တို့ဟာလဲ ကိုဗစ်ကြားထဲကရွေးကောက်ပွဲ ကျင်းပခဲ့ပါတယ်။ ဒီဥပမာမှာ ဆင်းရဲတဲ့နိုင်ငံရော ချမ်းသာတဲ့နိုင်ငံပါ ပါပါတယ်။

အကျဉ်းချုပ်ပြောရရင် ကိုဗစ်ကြောင့် ရွေးကောက်ပွဲကို မရွှေ့သင့်ပါ။ ရွေးကောက်ပွဲရွှေ့တာဟာပြဿနာကို ဖြေရှင်းတာမဟုတ်ဘဲ မြန်မာပြည်ရဲ့ နိုင်ငံရေး၊ စီးပွါးရေး၊ ကျန်းမာရေး၊ လူမှုရေးပြဿနာတွေကို ပိုဆိုးသွားစေမှာပါ။ အာဏာသိမ်းပြီး ပြည်တွင်းစစ်တောင် ဖြစ်သွားနိုင်ပါတယ်။ တကယ်ကိုဗစ်အတွက် စိုးရိမ်ခဲ့ရင် ပါတီများအားလုံး လိုင်းပေါ်ကသာ မဲဆွယ်တာကို နောက်နှစ်ပတ်လောက်အနည်းဆုံး လုပ်သင့်ပါတယ်။ NLD ကလူတွေအပြင်ထွက် မဲမဆွယ်ဘဲ လိုင်းပေါ်ကသာ မဲဆွယ်ဖို့စဉ်းစားသင့်ပါတယ်။ ဒါဆိုရင် NLD ဟာ သူတို့ထောက်ပြနိုင်တဲ့ လူစုတာကို နှစ်ပတ်လောက်နားထားပြီး လိုင်းပေါ်ကသာ မဲဆွယ်ခြင်းဖြင့် ရောဂါပိုးကူးတာကိုလဲ တားနိုင်မှာဖြစ်သလို ရွေးကောက်ပွဲကိုလဲအချိန်မှီ လုပ်နိုင်မှာပါ။

ကိုဗစ်ကြောင့် ရွေးကောက်ပွဲ နောက်ဆုတ်ခဲ့ပြီး စစ်အာဏာရှင်သာ ပြန်အုပ်ချုပ်ခဲ့ရင် မြန်မာပြည်ရဲ့ပြည်တွင်းစစ်နဲ့ ဆင်းရဲမှုကြောင့် သေသူများဟာ ကိုဗစ်ထက် အဆပေါင်းထောင်သောင်းချီ သွားနိုင်တယ်လို့သာ ပြောပါရစေ။

ဒါကြောင့် ရွေးကောက်ပွဲကို နိုဝင်ဘာ ၈ ရက်မှာ ဆက်လုပ်ပါ။ ဒါပေမယ့် လိုင်းပေါ်ကသာ နောက်နှစ်ပတ်လောက်မဲဆွယ်ပေးပါ။ လမ်းပေါ်ထွက် မဲမဆွယ်ပါနဲ့။ ဒါဆို မြန်မာပြည်ကြီး အဆင်ပြေပါပြီ။ ကိုဗစ်လဲထိန်းနိုင် ရွေးကောက်ပွဲလဲ ဆက်လုပ်နိုင်ပါမယ်။ သားရွှေအိုးထမ်းကိန်းပါ။