ရမခ ကျအပြီး အဘ ပါတော်မူမလား

ရမခဟာ ဇူလိုင် ၂၅ က ကျတယ်လို့ ကြေညာပေမယ့် ဒီနေ့မှသာ ရမခတိုင်းကို အတွင်းအထိ ဝင်သိမ်းနိုင်တာပါ။ ရမခတိုင်းဟာ ဧကများစွာကျယ်တာ မမေ့ပါနဲ့။ စစ်ကူကလဲ ရှမ်းတောင်ကနေ လာနေပါတယ်။

မအလအဖြစ်မှန်ကို ဘယ်လောက်သိလဲမေးရင် အင်္ဂလိပ်-မြန်မာ စစ်ပွဲတွေကို အမှတ်ရစေမှာပါ။ ပထမ အင်္ဂလိပ် မြန်မာစစ်မှာ ဗန္ဓုလက ရခိုင်နယ်စပ်မှာ တကယ်စစ်နိုင်ခဲ့ပေမယ့် ရန်ကုန်ကို အင်္ဂလိပ်ဝင်လာချိန်မှာ စစ်ရှုံးခဲ့ပါတယ်။ အင်္ဂလိပ်ကို စစ်ရှုံးတာကို ဘုရင်ထံ အစပိုင်းမှာ ပြန်မရောခဲ့ပါ။ ဘုန်းတော်ဘွဲ့တွေနဲ့သာ အချိန်ကုန်ခဲ့တာပါ။ ထို့အတူ တော်လှန်ရေးအစပိုင်း စစ်ကိုင်း၊ ကရင်၊ ကရင်နီဘက်မှာ မအလတပ် ခံခဲ့ရပေမယ့် ဘုန်းတော်ကြောင့် ရန်သူတွေကို နှိမ်နင်းနိုင်ကြောင်းသာ တင်ပြခဲ့ကြပါတယ်။ အချို့ ရန်ကုန်မှာ ညွန့်ဝင်းဆွေ၊ မန္တလေးမှာ ကိုကိုဦးတို့က NLD မိသားစုဝင်တွေကို သွေးသောက်နာမည်နဲ့သတ်တာ၊ ယူဂျီတွေကို နှိမ်နင်းနိုင်တာရှိပေမယ့် ဒါတွေဟာ စစ်ပွဲတွေမဟုတ်ပါ။ ထို့အတူ ၁၀၂၇ ပထမပိုင်းမှာလဲ မြို့အလိုက်ကျပေမယ့် မအလထံက နယ်မြေရှင်းလင်းရေး ဆောင်ရွက်နေတယ် ဘာညာဆိုပြီးသာ တင်ပြခဲ့ကြတာပါ။ နောက်ပိုင်း လောက်ကိုင်မကျခင် 'ဝ' အထွက်တံတားကို ဗုံးမကျဲခိုင်းတာက မအလရဲ့ ဗျူဟာအမှားပါ။ ဒါကြောင့် ပထမဟိုင်ဂင်တက်တဲ့ မအလအဖွဲ့ရဲ့လေသံက လွှတ်တော်ထဲကလေသံလို မာခဲ့ပါတယ်။ လောက်ကိုင်လက်နက်ချချိန်မှသာ မအလရဲ့ သက်တော်စောင့်တပ်မှူးကိုလွှတ်ပြီး သဘောတူခဲ့တာပါ။ ဒီကောင့်လေသံက အပိုးကျိုးပါတယ်။

၁၀၂၇ ဒုတိယလှိုင်း

ဒါက အင်္ဂလိပ်-မြန်မာ ဒုတိယစစ်နဲ့ သွားတူပါတယ်။ ပုဂံမင်းဟာ အင်္ဂလိပ်အားသာတာကို သိပါတယ်။ သူ့ရန်ကုန်မြို့တော်ဝန်က တောင်းပန်ပေမယ့် အင်္ဂလိပ်က တိုက်ချင်လို့ တိုက်ပါတယ်။ ပုဂံမင်း စစ်ရှုံးခဲ့ပါတယ်။ ဒါပေမယ့် စစ်ပွဲဖြစ်ချိန်မှာ ပုဂံမင်းက သူ့တပ်က ကုလားဖြူတွေကို နိုင်နေပြီလို့သာ ထင်ခဲ့ပါတယ်။ ပုဂံမင်းက သူ့တပ်ဟာ ပြင်ဆင်မှုတွေလုပ်ထားလို့ အင်္ဂလိပ်တပ်ကို နိုင်မယ်လို့ ထင်ထားခဲ့ပါတယ်။

မအလဟာ အမေရိကန်ထံက တရုတ်ဟာ 'ဝ' ကတဆင့် ကျားဖြန့်ကိစ္စ လက်နက်ထောက်ပံ့တာကို သိပြီးသားပါ။ တရုတ်က မအလတပ်ကို ကျားဖြန့်ကိစ္စမှာ တိုက်ရခက်မယ်ထင်ပြီး လက်နက်တွေကို ပို‌ပေးခဲ့မိပုံရပါတယ်။ မအလတပ်ဟာ ဟန်သာရှိပြီး အဆန်မရှိလို့ ဟိုကောင်တွေက အဆိုပါလက်နက်နဲ့ မန္တလေးတောင် သိမ်းနိုင်မယ့် အခြေအနေပါ။  ဒါပေမယ့် မအလဟာ သူ့အောက်က ကြည်း၊ရေ၊လေ ညှိကွပ် မောင်မောင်အေးနဲ့ ဒုချုပ်စိုးဝင်းတို့ရဲ့ ဝ နယ်ကို ဗုံးကျဲဖို့၊ ဝနယ်က အထွက် တံတားတွေကို ဖျက်ဆီးဖို့ဆို‌တဲ့ စစ်ရေးအစီအမံတွေကို နားမထောင် ပယ်ချခဲ့ပါတယ်။ ယခုအထိပါ။ ဒါကြောင့် လောက်ကိုင်သာကျဲနေတာပါ။  မအလဟာ အချိန်ဆွဲပြီး သူစုထားတဲ့ လူသစ်တွေနဲ့ ရှမ်း‌မြောက်ကအစ တစ်တိုင်းပြည်လုံကို ပြန်သိမ်းနိုင်မယ်လို့ ထင်ခဲ့ပုံပါ။ ဟိုက လက်ဦးသွားပါပြီ။

ခေတ်သစ်က ရှမ်းမြောက်ကျပြီတင်ချိန် ဇူလိုင် ၂၅၊ ဆောင်းခတင်ချိန်က ရမခဌာနချုပ် မကျသေးပါ။ ဆိုက်ဝါးအရ လုပ်သွားတာပါ။ နောက် ဆောင်းခကလဲ နိုင်ငံရေးအရ ကြေညာတာပါ။ ပဏာဝင်ယူတာ‌ပေါ့။ ထိုအချိန်မှာ မြေပြင်ကအဖွဲ့နဲ့ အဆက်ပြတ်သလို တိုင်းမှူးနဲ့ ဒုတိုင်းမှူးကလဲ အဆက်ပြတ်သွားခဲ့ပါတယ်။ ဒါကတော့ မအလတပ်ရဲ့ ဆက်သွယ်ရေးကွန်ယက်ကို ကိုးကန့်က နည်းပညာသာလွန်လို့ ဖြတ်တောက်ထားတာလား မတော်တဆ တိုက်ဆိုင်စွာပြတ်သွားတာလား မသိပါ။ ထိုနေ့ခင်းမှာ အဆက်အသွယ်ပြန်ရချိန်မှာ ရမခ မကျသေးတာ စာရေးသူသိပါပြီ။ ဒါပေမယ့် စာရေးသူတို့က လူအဆဲခံပြီ ထွက်မရှင်းပါ။ အချို့ကိစ္စက ပါးနပ်ရပါတယ်။ ဘုရားရှင်ဟောသလို မှန်ပေမယ့် အကျိုးမရှိတဲ့စကားကို မပြောပါ။

မအလဟာ ယာယီသမ္မတရာထူးယူချိန်မှာ အားလုံးရဲ့ အထူးသဖြင့် တရုတ်ရဲ့ မျှော်လင့်ချက်ကို လက်ခလယ်ထောင်ပြလိုက်တာပါ။ တရုတ်တောင်းဆိုတာဟာ ဒီမိုတွေ မျှော်လင့်တာထက် အများကြီး ကွာပါတယ်။ ဒါတောင် မအလက မလုပ်ပါ။ ဒါကြောင့် ရမခထိုးစစ်ဟာ ဆက်ပြင်းလာနေပြီး ဒီနေ့ MNDAA က ရမခအထဲဝင်ရှင်းနေပြီး ရှမ်းတောင်က စစ်ကူမရောက်ရင် ဩဂုတ် ၈ ရက်နောက်ဆုံးပါ။  ဒီနေ့တောင် အပြီးကျနိုင်ပါတယ်။

ဒီအချိန်မှာ အောက်ခြေသတင်းက အစပိုင်းမှာ ရမခ မကျသေးတာ မှန်ပေမယ့် အခြားစခန်းကျချိန် ဇောမဲလုံးက သေချာမရှင်းနိုင်ချိန်၊ မအလမိမိကိုယ်ကို သမ္မတခန့်ချိန်မှာ ဗိုလ်ကြီး၊ ဗိုလ်မှူးနဲ့ ဒုဗိုလ်မှူးကြီးအဆင့်က စစ်မတိုက်ဘဲ ထွက်ပြေးကုန်ကြပါတယ်။ အထက်ကိုတော့ ဘုန်းတော်ကြောင့် စစ်ကူတွေပို့ပြီး နယ်မြေရှင်းလင်းရေးကို အောင်မြင်စွာလုပ်ဆောင်နေပါသည်လို့ သတင်းပို့ထားပါတယ်။

ဒီစစ်ပွဲကလဲ ဒုတိယ အင်္ဂလိပ်-မြန်မာစစ်လို စစ်ဖြစ်ရင် ရှူံးနိုင်တယ်ဆိုတာ မအလသိလျှက်နဲ့ မတားနိုင်ဘဲ စစ်ရှူံးရမှာပါ။

မေးခွန်းက ဒုတိယလှိုင်း ဘယ်မှာရပ်မလဲဆိုတာပါ။ မအလက သက်တမ်းမတိုးဘဲ တရုတ်စကားအတိုင်း သိန်းစိန်ကို အာဏာအပ်ပြီး ကိုကိုကြီး(သို့) စိုင်းအိုက်ပေါင်းကို ဝန်ကြီးချုပ်ခန့်၊ စန္ဒာမင်း၊ အေးမောင်ကို ဝန်ကြီးခန့်ခဲ့ရင် ဒီမိုတွေ တွေဝေသွားနိုင်ပါတယ်။ တရုတ်ဖိအားကလဲ မြောက်ပိုင်းသုံးဖွဲ့ထံ ပြင်းလာမှာပါ။ ဒါပေမယ့် မအလက သက်တမ်းတိုးလိုက်လို့ တွေ့ဆုံရေးနည်း၊ ရွေးကောက်ပွဲနည်းက အသုံးမဝင်တော့ပါ။ မအလက တရုတ်ကို လီ-ဘဲလို့ ပြောလိုက်တာပါ။ ဒီနေရာမှာ တရုတ်မကြိုက်တဲ့ နေရာမှာတော့ မအလဟာ ဒီမိုတွေနဲ့ သဘောထားတူပါတယ်။

မေးခွန်းက မြောက်ပိုင်းသုံးဖွဲ့ထဲက TNLA နဲ့ရင်းနှီးတဲ့ NUG လက်အောက်ခံ MDY PDF က မန္တလေးအထိ ဆင်းလာမှာလား ‌မြောက်ပိုင်းက ကူမှာလားဆိုတာပါ။

တရုတ်ဟာ သူ့စက်ရုံတွေ NUG အောက်ရောက်လာလို့ NUG ရဲ့ နိုင်ငံခြားရေး၊ ကာကွယ်ရေးဝန်ကြီးဌာနတွေကို အသိအမှတ်ပြု စကားပြောလာနေရပါပြီ။ ဘယ်သူမှ ဒေါ်လာသန်း ၈၅၀တန် စီမံကိန်းကို မပျက်လိုပါ။ NUG ဟာ ကမ္ဘာမှာ ဝင်ဆန့်လို့ မြောက်ပိုင်းသုံးဖွဲ့လို တရုတ်ဖိအားပေးဖို့ မလွယ်ပါ။ ယခုအချိန်အထိတော့ မအလဟာ ရှမ်းမြောက်မှာလဲ စစ်ရှုံးတယ်ဆိုတာကို လက်မခံဘဲ နယ်မြေရှင်းလင်းရေး လုပ်ဆောင်နေတယ်လို့သာ ပြောထားပါတယ်။ အောက်ခြေက တင်ပြရာမှာလဲ စခန်းကျတာမပါဘဲ ကျခဲ့တဲ့စခန်းကို ပြန်သိမ်းတာ၊ ပြည်သူတွေက ကြိုဆိုတာ၊ နယ်မြေရှင်းလင်းတယ်လို့သာ အစီရင်ခံ တင်ပြထားပါတယ်။ ဒါတွေဟာလဲ ပုဂံမင်းထံတင်ပြတာနဲ့ အင်မတန်တူပါတယ်။ မတူတာက ပုဂံမင်းမှာ အင်တာနက်၊ Facebook မရှိဘဲ မအလမှာ အင်တာနက်၊ Facebook၊ X တွေကြားက ပျော်ပျော်ကြီး အလိမ်ခံနေတာပါ။ ဟိုဘုန်းကြီးကိစ္စက မအလကို အောက်က ဘယ်လိုသတင်းပို့ လိမ်တယ်ဆိုတာက ထင်ရှားတဲ့ဥပမာပါ။ DASSK တောင် NLD CEC တွေ သူ့ကိုပြောရဲသူတွေနဲ့ မအလတပ်က ပေးမတွေ့ချိန်က သတင်းအမှားရခဲ့ပါသေးတယ်။

ဘာဆက်ဖြစ်မလဲ?

မေးခွန်းက ရမခ၊ အမ်းနဲ့ မြောက်ပိုင်းတိုင်းကျရင် မအလကိုယ်တိုင် အဖမ်းခံ၊ လုပ်ကြံခံ၊ ရာထူးကနေ အထုတ်ခံရနိုင်တာပါ။ သူ့ကိုထောက်ခံသူများကတောင် သူ့ကိုဖြုတ်ဖို့၊ နည်းပြလဲဖို့ ပေါ်တင်ပြောလာနေပါပြီ။ ဒါကတပ်ထဲမှာလဲ ဗိုလ်ချုပ်အဆင့်အထိ ပြောလာနေပါပြီ။ ဒါပေမယ့် သူ့ကိုဖြုတ်ပြီး ဘယ်သူတက်တက် ပြည်သူ့အစိုးရကို အာဏာပြန်မပေးရင် ဒီစစ်ပွဲက ဆက်ဖြစ်နေမှာပါ။ ရွေးစရာနည်းလမ်း သုံးခုသာရှိပါတယ်။

ပထမနည်းလမ်း

မအလကိုဖမ်း/မုန့်ဟင်းခါးကျွေးပြီး ပြည်သူ့အစိုးရကို အာဏာပြန်အပ်တာပါ။ ဒါက အချို့လူ့အခွင့်အရေးအဖွဲ့တွေ၊ အမေရိကန်ထောက်ပံ့ခံအဖွဲ့တွေ မကြိုက်နိုင်ပါ။ DASSK ပြန်တက်လဲ ချလိုသူက ဆက်ချနေနိုင်ပါတယ်။ ဒါပေမယ့် ဒီကိစ္စဟာ သွေးထွက်မှု အနည်းဆုံးပါ။ သူမရဲ့ အစိုးရမှာ ကချင်ဒုသမ္မတ၊ UWSA ဒုသမ္မတ၊ ကိုးကန့်ဒုသမ္မတ၊ TNLA ဒုသမ္မတ၊ KNU ကလဲ ပါလိုရင် ဒုသမ္မတ အနေနဲ့ပါရမှာပါ။ ရခိုင်က သီးခြားလွတ်လပ်တဲ့နိုင်ငံမိုလို့ မြန်မာနိုင်ငံထဲ မပါလောက်ပါ။ ဒါက အစ်ကိုထွန်းနဲ့ အစ်ကိုထွန်းခင်တို့ အရင်ညှိရမှာပါ။ ဒါက တော်လှန်ရေးမှာ ရှေ့ဆုံးကပါသူကို နေရာပေးတာပါ။ လူမျိုးများပြီး ရူးကြောင်ကြောင်လုပ်နေတဲ့ပါတီနဲ့ လက်နက်ကိုင်တွေကတော့ ပြည်သူ့ သဘောအတိုင်းပါ။ တိုက်ချိန်မပါ ထိုင်ခုံပါလိုရင်လဲ သူတို့ရဲ့ မျက်နှာပြောင်မှုပါ။

ဒုတိယနည်းလမ်း

မအလက အဆုံးစွန်အထိ မိုက်တာပါ။ ဒါဆိုရင် ဟိုင်ဂင်ကနေ စစ်ပွဲ ခဏရပ်ပြီး ‌၆ လနေမှ တတိယလှိုင်း ပြန်စမလားဆိုတာပါ။ ဒါဆိုရင် ပွဲက ရှည်မှာပါ။ ဒါပေမယ့် မအလမဆင်းရင် တရုတ်က တစ်ရစ်ခြင်း ကျပ်မှာပါ။ စာရေးသူတို့ ဒီမိုတွေက ဒါကိုအခွင့်အရေး ယူနိုင်အောင် ပြင်ဆင်ထားရုံပါ။

တတိယနည်းလမ်း

မအလက အာဏာမစွန့်တာကို တရုတ်အပါအဝင် အားလုံးသိလို့ ဟိုင်ဂင်လဲမဖြစ်ဘဲ နေပြည်တော်အထိ စစ်မရပ်ဘဲ ရှေ့ဆက်သွားတာပါ။ ဒါက ပိုမြန်မှာပါ။ ဒါပေမယ့် ဘယ်သူက မြန်မာပြည်မှာ အုပ်ချုပ်မလဲဆိုတဲ့ ပြဿနာကို ရင်ဆိုင်ရနိုင်ပါတယ်။

ဘယ်နည်းလမ်းသွားသွား ပြည်သူရော၊ တရုတ်ရောက ဇတ်မျောကို မစောင့်နိုင်ပါ။ ပြည်သူကလဲ စစ်ပြေးရတာ၊ စီးပွားရေးအရနာတာ များလှပါပြီ။ တရုတ်ကလဲ စစ်ပွဲရှည်လေ သူ့စီးပွါးရေးက အရှုံးပေါ်လေပါ။

ဘယ်နည်းကြည့်ကြည့် မအလအတွက် မဟန်ပါ။ ဒါကြောင့် မအလက ဘရွှေတို့က ပြန်အာဏာသိမ်းမရအောင် အကျယ်ချုပ်သဘောမျိုးထားပြီး ဘရွှေနဲ့နီးစပ်တဲ့ ရေချုပ်မိုးအောင်ကို ကြိုဖြုတ်ထားတာ၊ အခြားဩဇာခံ မခံမသေချာတဲ့ တပ်မမှူးတွေ၊ တိုင်းမှူးတွေကို ပြောင်းတာ ဖြုတ်တာ ထောင်ချတာ ခဏခဏ လုပ်နေတာပါ။ စစ်တပ်ထဲမှာ သူတို့စားရမလားလို့ အာဏာသိမ်းတာကို ထောက်ခံခဲ့သူ သူခိုးများဟာ ယခုအချိန်မှာ မခိုးရဘဲ သေရမလိုဖြစ်လာနေလို့လဲ အချင်းချင်း ပြဿနာစတက်လာနေတာပါ။ ယခင်က ဖိအားဟာ တပ်ရင်းမှူး၊ ဗျူဟာမှူးလောက်မှာသာရှိခဲ့ပြီး ယခုက တပ်မမှူး၊ တိုင်းမှူးအထက်အထိ ရောက်လာနေပါပြီ။

အကျဉ်းချုပ်ရရင် မအလဟာ ပါတော်မူမလား အသေထွက်လား နှစ်လမ်းသာ ရှိပါတယ်လို့သာ ပြောပါရစေ။ မြန်ချင်ရင်တော့ ပြည်သူက NUG အောက်က PDF ကိုသာ ဆက်ပြီး များများ လှူပေးပါ။