ရမခမှာ မအလဘာကြောင့်စစ်ရှုံးသလဲ

ရမခမှာ မအလဘာကြောင့်စစ်ရှုံးသလဲ

ဒီနေရာမှာ စစ်ရှုံးခြင်းရဲ့ အဓိက အခြေခံက နိုင်ငံရေးပါ။ မအာလာဟာ ပြည်သူ့အစိုးရကို ဖြုတ်ချခဲ့လို့ ဆန္ဒပြပွဲတွေကနေ PDF ပေါ်လာခဲ့တာပါ။ ဒါက လယ်ပြင်မှာ ဆင်သွားသလိုထင်ရှားနေခဲ့ပါတယ်။ ယခုရေးရာမှာ နိုင်ငံရေးကိုရှောင်ပြီး စစ်သားအနေနဲ့သာလျှင် အဓိကရေးသွားမှာပါ။ တစ်ရာရာခိုင်နှုန်းတော့ နိုင်ငံရေးကို ရှောင်ရေးလို့မရပါ။ ရှောင်နိုင်သမျှ ရှောင်ရေးပါမယ်။

ပထမဦးဆုံး စစ်မှာ အလစ်အငိုက်အတိုက်ခံရလို့ စစ်ရှုံးတာ ရှိတတ်ပါတယ်။ ဒါပေမဲ့ လောက်ကိုင်ကသာ အလစ်အငိုက် ခံခဲ့ရတာပါ။ လားရှိုးဟာ လာတိုက်ခံရမယ်ဆိုတာ လူတိုင်းသိနေတဲ့အရာပါ။ မအလကလည်း ဒါအတွက်ကို ပြင်ဆင်ခဲ့ပါတယ်။

စစ်ဆင်ရေးအထူးအဖွဲ့မှူးခန့်အပ်မှု

မအလဟာ လောက်ကိုင်စစ်ရှုံးရာမှာတာဝန်ရှိသူတွေထဲကလည်းတစ်ယောက်ဖြစ်တဲ့ ရမခတိုင်းမှူးနိုင်နိုင်ဦးကိုအထူးအဖွဲ့မှူး ပေးလိုက်တာက အဘအကွက်လှသလို ဘယ်သူမှ နားမလည်နိုင်ခဲ့ပါ။ အခုအချိန်မှာ ဒါက အကွက်လှတာမဟုတ်ဘဲ ကိုယ့်သေသွင်းကိုယ် တူးခဲ့တယ်ဆိုတာ လူတိုင်းလက်ခံမှာပါ။။ ဘယ်သူကများ စစ်ရှုံးသူတိုင်းမှူးကို နေဝင်းလက်ထက် ဘရွှေလက်ထက်မှာ ရာထူးတိုးပေးမှာပါလဲ။

မဟာဗျူဟာအမှား

မအလကို ဝ နယ်မြေကနေ ကိုးကန့်၊ TNLA နဲ့ AA ကို လက်နက်တွေထောက်ပံ့နေကြောင်း ရိက္ခာတွေထောက်ပံ့နေကြောင်း စရဖ ထောက်လှမ်းရေးနဲ့ အမေရိကန်က ပြောထားပြီးသားပါ။ စရဖကိုမယုံရင်တောင်မှ အမေရိကန်က အသေအချာ သတင်းပေးပြီးသားပါ။ အမေရိကန်က ဝကို တရုတ်က ဘယ်လိုကူညီတယ်ကအစ မအလကို ပြောပေးတာပါ။ သူ့မှာ ဒီသတင်းအချက်အလက်တွေ အကုန်ရှိခဲ့ပါတယ်။ မအလကိုလည်း ကြည်း၊ ရေ၊ လေ ညှိကွပ် မောင်မောင်အေး၊ ဒုချုပ်စိုးဝင်း၊ ရာပြည့်၊ မြထွန်းဦးတို့လို အကြီးပိုင်းတွေက စစ်ကို စစ်နဲ့တူအောင်တိုက်လိုရင် ဝဒေသက လက်နက်စက်ရုံတွေကို ဝအထွက်တံတာ’တွေကို ဖြတ်တောက်ဗုံးကြဲ ဖျက်ဆီးဖို့ တင်ပြခဲ့ကြပါတယ်။ ဒါကို မအလက ပယ်ချခဲ့ပါတယ်။

မအလဟာ သူယုံကြည်ရသူကို ဝထံလွှတ်ပြီး နယ်အချို့ကို အလျှော်အစားလုပ်ပြီး ကိုးကန့်ကို ဟန့်တားဖို့ ရှမ်းမြောက်က sspp ကို မြို့အချို့ပေးပြီးတော့ လူမျိုးရေးပဋိပက္ခဖြစ်အောင်သာ အားစိုက်ခဲ့ပါတယ်။ ဒါတွေဟာ ယခုအချိန်မှာ မဟာဗျူဟာအမှားဆိုတာ အားလုံးသိမှာပါ။  မအလဟာ လောက်ကိုင်စစ်ပွဲမှာလည်း ထိုအချိန်က ဝကိုတိုက်ရန် တင်ပြမှုကို ပယ်ချခဲ့ပါတယ်။ အဆိုပါ မဟာဗျူဟာအမှားအတွက် မအလာမှာသာ တာဝန်ရှိပါတယ်။

နည်းဗျူဟာအမှားများ

ရန်သူဟာ ခံစစ်ကုန်းကိုလာတိုက်ရင် ဗျူဟာအရ စစ်ကူလိုက် ပြန်တိုက်ရတာဟာ စစ်ရဲ့အခြေခံပါ။ ဒါပေမဲ့ လားရှိုးက ခံစစ်ကုန်းတွေကို လာတိုက်ချိန်မှာ ဘာမှ အင်အားနဲ့ တန်ပြန်တိုက်နိုင်ခြင်း မရှိခဲ့ပါ။ စနစ်တကျ ပြင်ဆင်ထားတာလည်း မရှိခဲ့ပါ။ တပ်အားလုံးဟာလည်း စိတ်ဓာတ်ကျပြီး စစ်ပန်းနေကြပါပြီ။

အမှားဆုံကတော့ စစ်ဌာနချုပ်ထဲက တပ်ထိပ်ပိုင်း သုံးလေးယောက်ရဲ့ မိန်းမတွေလောက်ကိုသာ နေပြည်တော်ရွှေ့ခဲ့ပြီး အခြား အောက်ခြေအဆင့် တပ်မိသားစုဝင်တွေကို စစ်ဖြစ်ရာနေရာကနေ မရွှေ့ပေးဘဲ အသေခံတိုက်ခိုက်ခိုင်းခဲ့တာက သူတို့က တကယ်အသေခံတိုက်နိုင်ရင်တောင် သူတို့ရဲ့ လူမမယ် ကလေးငယ်တွေကိုပါ အသေခိုင်းခဲ့တာဟာ မအလရဲ့ ရက်စက်ယုတ်မာမှုကို ပြသခဲ့ပါတယ်။

ဒါဟာ ပထမလောက်ကိုင်မှာ အလစ်အငိုက် အမှားဆိုပြီး ဆင်ခြေပေးလို့ရပေမယ့် ရခိုင်မှာ ယခု လားရှိုးမှာအထိဖြစ်လာတာက မအလနဲ့ သူအောက်ခြေ တပ်မှူးတွေရဲ့ နည်းဗျူဟာအမှားဆိုတာ အင်မတန်မှ ထင်ရှားနေခဲ့ပါတယ်။

စစ်ကူပစ်ကူ

စစ်ဖြစ်ရင် စစ်ကူပေးရတာ သဘာဝပါ။ ဒါပေမဲ့ မိမိတပ်က စစ်ကူတက်မယ့်လမ်းကြောင်းဟာ လုံခြုံရပါတယ်။ ကိုးကန့်က တူမီးနဲ့တိုက်နေတာမဟုတ်ပါ။ ဒါကို စစ်ကားတန်းနဲ့ သွားပြီး စစ်ကူပို့ခိုင်းတဲ့ ရွှေဉာဏ်ကိုက ရွှေချထားဖို့ကောင်းပါတယ်။ ဒီစစ်ကားတန်းကို ဖြတ်မတိုင်ရင် ကိုးကန့်က ဘယ်သူ့ကို တိုက်ရမှာပါလဲ။ ကျောက်မဲကိုစစ်ကူပို့ရာမှာ ရှမ်းကနေကားဖြတ်လို့ရပေမယ့် ဝ ကတော့ လွယ်လွယ်နဲ့ ပေးမဖြတ်နိုင်တာ အစကတည်းက သိဖို့ကောင်းပါတယ်။

ဆက်သွယ်ရေး

ဆက်သွယ်မှုစနစ် ဖြတ်တောက်ခံရတာ ကျိုးပေါက်တာကလဲ မိမိတပ်ကို ယုံကြည်မှုမရှိလို့ တပ်ချုပ်ကို ယုံကြည်မှုမရှိလို့ ဖြစ်တာပါ။ နောက်ကိစ္စကတော့ တပ်ထဲမှာလဲ တရုတ်စက်၊ သူတို့ကလဲ တရုတ်စက်သုံးပါတယ်။ တရုတ်စက်မကြိုက်ရင် ရုရှားစက် ဝယ်သုံးပါ။

နောက်ဆုံးကတော့နိုင်ငံရေးပါ

ယခုစစ်ပွဲမှာ တာဝန်ရှိဆုံးက ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်ပါ။ စစ်ဆင်ရေးအထူးအဖွဲ့မှူးကို သူကဖြုတ်လို့ရပေမယ့် သူ့ကို လက်ရှိဥပဒေအရ ဘယ်သူကမှ ဖြုတ်မရပါ။ ဒါကပဲ အခြားဒီမိုကရေစီပြောင်းတာမပြောင်းတာထား သူ့ ၂၀၀၈ ဖွဲ့စည်းပုံအရ စစ်ရှုံးနေသူကို ဖြုတ်ချလို့မရတာက ဖွဲ့စည်းပုံအားနည်းချက်ပါ။ သူက ဆိတ်ခေါင်းချိတ်ပြီး ခွေးသားရောင်းတာကို ထိုင်ကြည့်နေရတာပါ။

ဘောမတွေအားကျတဲ့ ရုရှားမှာ ပူတင်က နိုင်ငံရေးသမားပါ။ သူ့ရဲ့တပ် ယူကရိန်းမှာ အစပိုင်း စစ်ရှုံးချိန်မှာ သူကာကွယ်ရေးဝန်ကြီးနဲ့ စစ်ဦးစီးအရာရှိချုပ်တို့ကြောင့်လို့ သူသိချိန်မှာ အဆိုပါသူများကို ရာထူးကနေ ပူတင်က ဖယ်ရှားလိုက်ပါတယ်။ အစပိုင်း သူ့ကို ထိုသူတွေကြောင့် စစ်ရှုံးတယ်ပြောသူကို လုပ်ကြံခဲ့ပေမယ့် ထိုသူ့စကားကို နားထောင်ခဲ့ပါတယ်။

ထိုအတူပါပဲ မြောက်ကိုရီးယားမှာလဲ ဖက်ထီးက ကွန်မြူနစ်ပါတီရဲ့လူကြီးပါ။ သူက သူ့စစ်ဦးစီးချုပ်ကို ခန့်တာ ဖြုတ်တာတွေ လုပ်ပါတယ်။ ကွန်မြူနစ်သဘောအရ ဖက်တီးကင်က စစ်ကော်မရှင်ရဲ့ ဥက္ကဋ္ဌပါ။

ထိုအတူပါပဲ တရုတ်မှာလည်း လက်ရှိသမ္မတရှီက စစ်ကော်မရှင်ရဲ့ ဥက္ကဌပါ။ ဒုဥက္ကဋ္ဌက ကာကွယ်ရေးဝန်ကြီးပါ။ စစ်ဦးစီးအရာရှိက သူတို့အောက်မှာပါ။ သူကလဲ သူတက်အပြီး စစ်တပ်ကလူများကို လာဘ်စားမှုနဲ့ဖြုတ်ခဲ့ပြီး သူ့ကာဝန်ကိုလဲ ပြန်ဖြုတ်ခဲ့ပါတယ်။

မအလတပ်ထဲမှာက မအလက မိမိကိုယ်ကို သမ္မတကြေညာချိန်မှာ စိတ်ဓာတ်က အဝီစိကို ထိုးကျသွားကြပါပြီ။ ဘယ်သူမှ တိုက်ချင်ခိုက်ချင်စိတ်မရှိတော့ပါ။ ကျော်မျိုးမင်းတို့၊ ကျော်စိုးဦးတို့၊ အောင်မင်းတို့၊ သဇင်ဦးတို့က ပြည်သူမဟုတ်ပါ။

မိန့်ခွန်း

အကယ်၍ မအလကသာ ပြည်သူတင်မြှောက်သူဆိုရင် ယူကရိန်းသမ္မတလို မိန့်ခွန်းပြောပြီး ပြည်သူကလဲ ဝန်းရံမှာပါ။ အမေရိကန်နဲ့ အနောက်အုပ်စုကလဲ ယူကရိန်းလို ကူညီမှာပါ။ ယခုတော့ သူပြောတာက ပြည်သူအတွက် ဘာမှမထူးဘဲ သူ့ကိုသာ ဒေါသပိုဖြစ်ာလူမုန်းများစေပြီး တပ်ထဲမှာလဲ စိတ်ဓာတ်ပိုကျစေခဲ့ပါတယ်။ ဘာလို့လဲဆိုတော့ သူက ခြေမှုန်းမယ်သာ ပြောနေလို့ပါ။

အပေါ်ကရေးခဲ့တာတွေက ဘာကြောင့်စစ်ရှုံးရလဲဆိုတာကို မြင်သာအောင် ရေးပြတာပါ။ အဓိကကတော့ ပြည်သူမပါလို့ ပြည်သူ့ထံက အဓမ္မ အာဏာသိမ်းလို့ စစ်ရှုံးတာပါ။ ပြည်သူသာအဓိကပါ။